Субҳи рӯзи 16-уми июли соли 2025 дар Маркази таълимии Бонки миллии Ҷумҳурии Тоҷикистон бо қароргоҳ дар шаҳри Гулистони вилояти Суғд конференсияи илмӣ – амалии байнидавлатӣ дар мавзӯи “Ташаккули дониш ва малакаи амалии кӯдакон оид ба бехатрии ҳаракат дар роҳ” бо иштироки намояндагони Вазоратҳои корҳои дохилии 8 давлати узви ИДМ - Тоҷикистон, Федератсияи Россия, Ӯзбекистон, Қирғизистон, Қазоқистон, Озарбойҷон ва  Беларус, инчунин Туркманистон ба ҳайси нозир баргузор гашт. Чорабинии мазкур дар ҳошияи Слёти III байнидавлатии нозирони навраси ҳаракати давлатхои аъзои ИДМ роҳандози гардида, ҳадаф табодули таҷриба дар самти пешгири аз ҳодисаҳои роҳу нақлиёти бо иштироки кӯдакону наврасон, ҳифзу ҳимояи ҳаёту саломатии иштирокчиёни ҳаракат дар роҳ ва роҳандозии корҳои тарғиботии пешгирикунанда ҷиҳати пешгири аз чунин ҳодисаҳо ва таъмини бехатарии иштирокчиёни ҳаракат дар роҳ ба хусус кӯдакон гуфта шуд.

Конференсияро бо сухани ифтитоҳӣ муовини Вазири корҳои дохилии Ҷумҳурии Тоҷикистон генерал – майори милитсия Насимзода Акбар Ғиёс оғоз бахшида ҳайати меҳмононро аз номи Вазири корҳои дохилии Ҷумҳурии Тоҷикистон генерал – полковники милитсия Раҳимзода Рамазон Ҳамро барои ташриф ва ҷонибдории барномаи конфронс таҳният гуфт. Номбурда таъкид намуд, ки чорабинии имрӯза ва ҷараёни “Озмуни байналмилалии Нозирони навраси ҳаракат” баҳри боз ҳам беҳтар гаштани робитаи дӯстӣ, табодули таҷриба байни сохторҳои салоҳиятдор, огаҳи ёфтан аз навигариҳои техникӣ ва фаъолияти амалӣ ва бехатарии ҳаракат дар роҳ дар қаламрави давлатҳо – иштирокдорони Иттиҳоди Давлатҳои Мустақил мусоидат хоҳад кард.
Ҳамзамон дар робита ба чорабинии имрӯза муовини Директори Бюрои ҳамоҳангсозии мубориза бар зидди ҷиноятҳои муташаккил ва дигар намудҳои ҷиноятҳои хавфнок дар қаламрави ИДМ, генерал – майори милитсия Шарифзода Файзалӣ Раҳмоналӣ суханронӣ карда чорабиниро қадами устувор дар самти пешгири аз ҳодисаҳои роҳу нақлиётӣ бо иштироки кӯдакон унвон кард.
Мушовири Вазири корҳои дохилии Ҷумҳурии Тоҷикистон оид ба ҳамкориҳои байналмилалӣ, номзади илмҳои ҳуқуқшиносӣ, генерал – майори милитсия Солиев Карим Ҳоҷиевич ҳамчун модератор иштирокчиёни конференсияро муаррифӣ ва бо навбат намояндагони давлатҳоро ба суханронӣ ва баррасии мавзӯи баррасишаванда ҷалб намуд.
Дар маҷмӯъ дар рафти конференсия 10 маърӯза аз ҷониби мутахассисони самти бехатарии ҳаракат дар роҳ, пажуҳишгарон, тадқиқотчиён, олимони соҳаи ҳуқуқшиносӣ ва кормандони амалии дар самти бозрасии давлатии автомобилӣ фаъолият баранда матраҳ гардид.
Аз ҷумла, муовини якуми сардори Раёсати БДА ВКД Ҷумҳурии Тоҷикистон полковники милитсия Вайсзода Бахтиёр Шарифбег дар мавзӯи “Таҷрибаи амалӣ дар ташаккули дониш ва малакаи амалии кӯдакон оид ба бехатарии ҳаракат дар роҳ”, муовини сардори Хадамоти бехатарии ҳаракат дар роҳи Депортаменти бехатарии ҷамъиятии ВКД Ҷумҳурии Ӯзбекистон подполковник Кравченко Станислав Владимирович дар мавзӯи “” Таҷрибаи Ҷумҳурии Ӯзбекистон доир ба ташаккули дониш ва малакаи амалии кӯдакон оид ба бехатарии ҳаракат дар роҳ”,  муовини сардори Маркази тадқиқотӣ оид ба бехатарии ҳаракат дар роҳи ВКД Федератсияи Россия, номзади илмҳои биологӣ, подполковники политсия Прохоровна Анна Махмутовна дар мавзӯи “Пешгирии  ҷароҳатбардории кӯдакон дар ҳодисаҳои роҳу наҷлиёт, ҳамчун унсурисиёсати давлатӣ”, сардори Сарраёсати БДА ВКД Ҷумҳурии Беларус Ротченков Виктор Иванович, муовини сардори Сарраёсат оид ба таъмини ҳаракат дар роҳи ВКД Ҷумҳурии Қирғизистон подполковники милитсия Джумагулов Айбек Рысқулович, муовини сардори Сарраёсати давлатии полтсияи роҳи Ҷумҳурии Озорбойҷон полковники политсия Гулиев Руфат Рагим оғлы дар мавзӯи “Ташаккули дониш ва малакаи амалии кӯдакон оид ба бехатарии ҳаракат дар роҳ”, директори ҶДММ “Насли дигар” Ҷун Ҷай Ҳо дар мавзӯи “Татбиқи интелекти сунъӣ дар фаъолияти БДА вобаста ба таъмини бехатарии ҳаракат дар роҳ”, сармутахассиси  Вазорати тандурустӣ ва ҳифзи иҷтимоии Ҷумҳурии Тоҷикистон оид ба травмотология ва ортопедия, доктори илмҳои тиб, профессор Қурбонов Саидбилол Хушвахтович джар мавзӯи “Асосҳои психологии пешгирии ҷароҳатбардории кӯдакон дар ҳодисаҳои роҳу нақлиётӣ” ва сардори Факултети №4 Академияи ВКД  номзади илмҳои ҳуқуқшиносӣ полковники милитсия Ғафурӣ Меҳриддин Садриддинзода дар мавзӯи “Асосҳои назариявии ташаккули дониш ва малакаи амалии кӯдакон оид ба бехатарии ҳаракат дар роҳ” баромад намуданд.
Ҳар як маърӯзачӣ таъмини бехатарии ҳаёту саломатии кӯдакон ва дигар иштирокчиёни ҳаракат дар роҳро муҳим ва самти афзалиятноки фаъолият барои хадамотҳои таъминкунандаи қоидаҳои ҳаракат дар роҳ шуморида, бо истифода аз тадқиқотҳои илмӣ таҳлилу баҳогузорӣ ва роҳҳои пешгирикунандаро аз таҷрибаи фаъолияти амалии давлати худ пешниҳод мекард. Иштирокчиёни конференсия дар рафти маърӯзаи баромадкунандагон фаъолона ба музокира ҳамроҳ шуда посухҳои мушахас аз ҳамкасбони худ мегирифтанд.
Кумитаи тадорукоти чорабинӣ, ки роҳбарияшро ВКД Ҷумҳурии Тоҷикистон ба уҳда дошт пешниҳод кард, ки маърӯзаҳо дар шакли чопӣ дастраси мақомотҳои таъминкунандаи бехатарии ҳаракат дар роҳ гардад. Якдилона пешниҳоди мазкур аз тарафи намояндагони давлатҳои иштирок дошата пазируфта шуд.
Қобили қайд аст, ки дар ҷараёни чорабинӣ  намояндагони ВАО дохилӣ ва хориҷӣ иштирок доштанд.
Акбар шарифӣ, подполковники милитсия.